Friday, April 04, 2008

وماذا بعد الإضراب






فرحت كثيرا بعدما ما عرفت بتفاصيل الإضراب


أخير الشعب هايتحرك


أخيرا هانتألم بصوت
أخيرا هانقول كفايه بجد تعبنا
كفايه للفساد
كفايه للغلاء
كفاية للظلم
أخير هانحاول نغير المنكر
ونقول إشهد يارب
عملنا اللى فى وسعنا
وبرغم الفرحة دى

بداخلى هموم وتساؤلات كثيرة كثيرة
ولما نعمل إضراب
ولوحصل وإستجابوا لمطبنا
هانكون نسينا نطالب بحكم إسلامى
ولو الحكومه وقعت
هاتيجى حكومه شكلها إيه
هاتيجى إسلامية منين
شجرة الحنضل لا تطرح تفاح
ولو جت إسلامية
هل الشعب هايتقبل حكومة إسلامية
ومازال يتكاسل عن أداء الفرائض
ولم تتشرب قلوبنا حب الإسلام
طبعا نظرة تشاؤمية ولكنه الواقع



كان نفسى قبل مانعمل إضراب علشان غلاء الأسعار والفساد اللى عايشين فيه
نعمل إضرب علشان التبرج المتواجد بين فتيات الإسلام
نعمل إضراب علشان الكليبات العاريه
ونقول مش بلاد المسلمين اللى يدخلها حاجة زى دا

لان أساس الفساد مش ناتج من فساد الحومه وبس
الفساد
ناتج من فسادنا إحنا الشعب المسلم
الفساد
ناتج من بعدنا عن دين ربنا
الفساد


ناتج إن المسلمين أصبحوا مسلمين فى البطاقات وكفى

الناس قريبه جدا من ربنا
ولكن عاوزه اللى ياخد بإيدها
عاوزين الناس تلتزم
يكون الإنسان الغير ملتزم هوه الشاذ
وليس العكس
بحلم باليوم إن كل الجماعات الإسلامية تتوحد
بدل ما الناس بتدخل المسجد وتبدأ تصنف
إخوان ولا سلفىولا أنصارولا جهاد
وتبدا تنقى هاجلس مع مين

نفسى نكون إيد واحده
ونحترم آراء بعض
ونبدأ نحرر أنفسنا من أنفسنا

أعلم همم عاليه كالجبال تسعى لعز الإسلام
ولنهضة البلاد
ولكنها وحدها لاتكفى
عاوزين نقاوم كلنا الفساد
مش فئه معينه
وكلنا نتعلم العلم
مش فئه واحده
وكلنا نكون دعاه
مش فئه واحده
كل على حسب إستطاعته
عاوزه لما نكلم البنات ونقولهم بلاش تبرج
تكون فى مليون بنت تانية بتقولهم نفس الكلام
عاوزين الشباب بيقول لازم صلاة جماعه
ومليون شاب تانى بيقولهم نفس الكلام
عاوزين إنقلاب يحصل فى موازين الناس

عاوزين أولوياتنا ربنا والرسول
مش أكل العيش والزواج والمنصب
عاوزين الدنيا كلها تتكلم وتقول
إحنا أحفاد محمد بن عبد الله
إحنا الشعب المسلم
اللى هايطلع منه حكومه مسلمه
ترجع كرامة الفرد المسلم اللى بيراق دمه فى كل مكان
تقف على رجليها
عاوزين نصنع أكلنا
ونزرع أرضنا
عاوزين نبكى على حالنا
حال المسلمين
حال بعدنا عن ربنا
قبل مانبكى على حال حكومتنا
والفساد اللى معيشانا فيه
وسعتها

هايأتى النصر الحقيقى
ألا إن نصر الله قريب
إن تنصروا الله ينصركم ويثبت أقدامكم
وإن مع العسر يسرا إن مع العسر يسرا
____________________ الخلاصه____________________
الإضراب اللى هايحصل جايز يحقق مطالب شعب
ولكن نريد إضراب يحقق هدف شعب مسلم
والإضراب اللى يحقق هدف شعب مسلم ليس بالتظاهر والضغط على الحكومات بقد ما بتغيير النفس وتربيتها وتربية من حولنا لنعز ديننا وننصره ونصل للحكومة إسلامية
ولذلك يجب ان يكون غضبنا لديننا قبل أن يكون لرغيف الخبر حتى نصل للهدف المنشود

ولكن بالطبع سنشارك فى الإضراب

حتى لا يتمادى الظالمون فى ظلمهم

وإن كان الضرر لاحق بنا كلنا

فلنكن يد واحدة

فلا تتركوا فئه معينه أمام المدفع

وتنسحبوا




15 comments:

نور said...

ربنا يبارك فيك يامسلمه كلامك مظبوط جدااا أصبتى القول اختى الحبيبة ..يارب نقدر نعمل حاجة فى اليوم ده نرفع بيه ولو جزء من الظلم الواقع علينا احنا كشعب مظلومين ومتبهدلين من كل ناحية ومش ملاحقين نهائى ع الكبوات والظلم حتى من الحاكم بتاعنا والحكومة بتاعتنا ..الله المستعان ...اسأل الله عز وجل أن يرد المسلمين الى دينهم رداً جميلا وان يرجع للاسلام والمسلمين العزة والتمكين ... اللهم آآآآمين ...اختك نور الاسلام

انا مسلمه said...

أهلا بيكى يانور الإسلام

ربنا يبارك لك

اللهم أستخدمنا لنصرة دينك ولا تستبدلنا

أسد الدين said...

السلام عليكم ، وهنا ايضا رد آخر ..كلامك فى النهاية نقض كلامك فى البداية ..كيف هذا ؟؟ ..هل من الاسهل ان اغيرك انت الغريبة عنى أم أغير نفسى ؟؟ بالطبع اغيرك أنت هههههههه ..بجد انا طبعا ...لما أمر الله النبى صلى الله عليه وسلم بالصلاة قال له ..وامر اهلك بالصلاة واصطبر عليها ..بدأ بمن حوله ..وانذر عشيرتك الاقربين ..يا أخت ندى لكى يفرز المجتمع حكومة اسلامية التوجه والغاية والعزة ..لابد ان يُصبغ هذا المجتمع كله بصبغة الله ..بالدين الحنيف ..هل تعلمين كم عدد من يحج الى ضريح المسمى سيد البدوى .سنويا اكثر من 5 ملايين هذا فى مصر ....5 ملايين مشرك بالله عز وجل ..باكر على الحكومة الاسلامية الان لكن كل شئ بأمر الله عسى ان يكون موعدهم الصبح أليس الصبح بقريب ؟..أقم دولة الاسلام فى قلبك تقم على أرضك ..عليكم أنفسكم لا يضركم من خذلكم ...الاسلام هذه الايام بين استعجال الشباب للتمكين ..واستبطاء الشيوخ للتمكين ..وهما مخطأن ...لأنهم لايعلمون سنن الله فى الارض ..وعد الله الذين آمنوا وعملوا الصالحات ليستخلفنهم فى الارض كما استخلف الذين من قبلهم وليمكنن لهم دينهم الذى ارتضى لهم ..الصبر ...والصبر واجب ..فى امان الله

عاشقه الفردوس said...

ندي ياندي


هتجننيني تعرفي كده
:P

ممممممممممم

يعني نضرب ولا ننفض
:P

لا ماتاخديش في بالك لسه صاحيه من النوم ع البوست بتاعك


ربنا يستر

انا مسلمه said...

لا طبعا ياعاشقة الفردوس نضرب

بس الإضراب من وجهة نظرى مش هايحقق الأهداف المرجوه وإن كان لازم يحدث لوقف الظالمين عن حدهم
و
لاننا مش ينغع نسكت

طيب باتكلم ليه وصدعتكم

دى الأفكار اللى ماليه دماغى الأن وبعرضها

لانى حاسة إننا فى مصيبه

وإننا مقصرين فى الدعوة جدا

مقصرين فى إننا نوصل الإسلام للناس

نفسى بيدأ من إمبارح ونشتغل فى الدعوة ونغير الشعب المصرى

عاوزين نروشهم بالدين

عاوزة إتحاد بين الاخوان والجماعات الإسلامية الأخرى

يكون منظم

وهدفه واضح

وليكن كمان 5 سنين يكون 90% من الشعب المصرى عايش بالإسلام

وكل الناس تشتغل فى الموضوع دا

هانصحح مفهوم الدين

هانعمل أسلمة للناس

ولو على رقبتنا
---------
أخونا أسد الدين

لى عوده

انا مسلمه said...

أخونا أسد الدين

انا معاك فى كلام حضرتك

وأننا إذا أردنا دولة الإسلام لابد أن تقام أولا فى نفوسنا

ولذلك أضفت الخلاصه فى النهايه

ولكن مش معنى إن حضرتك علشان مش هاتقدر تغيرنى
أجى أضربك وتسكت
وهذا الحال مع حكومتنا
مستحيل نشوف كل الفساد دا

ونسكت

لازم نتكلم

لازم يكون لينا واقفه

يمكن تكون الإيجابيه دى هيه البدايه

ولكن دورنا كأفراد تريد الوصول إلى تطبيق الشريعة الإسلامية أكبر من إضراب من أجل الغلاء

وجزاكم الله خيرا على زيارتكم وطرحكم للموضوع

Anonymous said...

الكلام كويس يا مسلمة ولاكن يوم واحد لايكفى لكى تكون الحكومة سليمة ونزرع ارضنا ولكن ساشارك فى الاضراب
اختك خديجة

nonoymm said...

السلام عليكم اختي ندى
ما شاء الله لا قوة الا بالله
مدونتك رائعة جدا ربنا يبارك فيكي يارب
شرفتيني بزيارتك لمدونتي المتواضعة
باذن الله ساتابع مدونتك الجميلة
موضوع الاعتصام حضرتك عرفتي رايي فيه
انما النظرة التشاؤمية للاعتصام اللي حضرتك شيفاها وحساها انا برضه معاكي فيها جداونفسي فعلا نعمل انقلاب برضه على حالنا وانفسنا
تظرة اكثر عمقا
بارك الله فيكي
تحياتي

أنا إنسان said...

الله اكبر
واسيقظ الشعب
وقام من نومته
ولا مكان لفرعون وجنوده
الله اكبر

tamooh said...

انتظر بوست عن بعد الاضراب منك باذن الله

ربنا يكرمك يارب

عمر المصرى said...

السلام عليكم
الإضراب نجح نجاح جزئى
وحقق حاجة كويسه وإن الناس عرفت إن ممكن الموضوع يتعمل وإن شاء الله تكون بداية لأنفراجة إن شاء الله
بس أهم حاجة نشيل حزب الشيطان من مطرحه

مسلمة said...

أهلا بيكى أختنا عاشقة النقاب

نورتى المدونة

وشكرا على تعليقك

مسلمة said...

أخونا أنا إنسان أهلا بحضرتك


نعم إستيظ العملاق

ولكن

لا نتمنى أن ينام مرة اخرى ان لم تستجسب حكومتنا إلى مطالبه

مسلمة said...

أهلا ياطموح

تورتى المدونة

أما عن البوست اللى بعد الإضراب

لما تضح لى الأمور إن شاء الله انزله

مسلمة said...

أهلا بيكى أخونا عمر المصرى

بالنسبة للإضراب

لم أرى نتائج له سوى رفع أجور عمال المحله عما وصل لى

ولكن لم اسمع عن إنخفاض فى الأسعار إلى الأن بعد الإضراب

أما نجاحه
نجح من ناحية إيقاظ الشعب من غفلته

جزاكم الله خيرا على مروركم